یه‌كێتى و پارتى.. مه‌ترسین له‌سه‌ر كه‌ركوك

خه‌ڵه‌ف غه‌فور
عه‌یامێكه‌ یه‌ژین به‌هۆى ته‌ماعى عه‌ره‌ب و پرۆژه‌ى بیانى له‌ پشت توركمانه‌وه‌، دۆخى چه‌وساندنه‌وه‌ و په‌راوێزخراوی له‌ كه‌ركوك درێژه‌ى هه‌یه‌، زۆرجاران له‌مه‌دا زیاده‌ڕۆییمان ده‌كرد و چه‌ندین به‌یت و بالۆره‌ى سه‌یروسه‌مه‌ره‌مان ڕێكده‌خست. ئه‌ى ئێستا چى كه‌ به‌ده‌ستى خۆمان ده‌مانه‌وێت یه‌كڕٍیزى هێزه‌ سیاسییه‌ كوردییه‌كانى كه‌ركوك بشیوێنین و ببینه‌ مه‌ترسى ڕاسته‌قینه‌. كێ له‌پشت ئه‌م كاره‌وه‌یه‌؟
بۆ هه‌ڵبژاردنى په‌رله‌مانى عیراق(كانوونى دووه‌مى 2010) زۆرێك له‌ لایه‌نه‌ سیاسییه‌ كوردییه‌كانى كه‌ركوك بڕیاریانداوه‌ به‌لیستى جیا به‌شدارى بكه‌ن، ئه‌مه‌ بۆ كاتێك كه‌ركوك و عیراق كێشه‌ى ناوخۆیى و مه‌ترسى شه‌ڕى تایفى و گه‌ڕانه‌وه‌ى دیكتاتۆریه‌تى له‌سه‌ر نه‌بوایه‌ و پرۆسه‌ى دیموكراسى گه‌شه‌ كردوو بووایه‌، شتێكى ته‌واو ئاسایى بوو، بگره‌ زۆر باش بوو به‌م شێوه‌یه‌ كورد ململانێى سیاسى بكردایه‌ و كاره‌كته‌رى سه‌ره‌كى نێو پرۆسه‌كه‌ بووایه‌، به‌ڵام ئێستا چى كه‌ به‌یه‌ك لیستى و برایه‌تى نێوان هێزه‌كانیشه‌وه‌ ده‌ره‌قه‌تى عه‌ره‌بێكى ده‌ هه‌زارى و برایه‌كى توركمان نایه‌ین؟
مه‌ترسییه‌كانى سه‌ر كه‌ركوك دوو جۆرن، یه‌كه‌میان: مه‌ترسى عه‌ره‌ب و توركمانه‌كان و ئه‌جێنداى ئیقلیمى و ساردى ئه‌مریكا له‌دواى پرۆسه‌ى ئازادى عیراقه‌وه‌ بۆ چاره‌سه‌ركردنى. دووه‌م: مه‌ترسى كورد خۆى ئه‌ویش بریتییه‌ له‌وه‌ى ڕازیبن له‌سه‌ر دابه‌شكارى هێزى كوردى له‌وێنده‌ر و ئه‌و سیاسه‌ته‌ نادروسته‌ى هێزه‌ كوردییه‌كان له‌ماوه‌ى ڕابردوودا په‌یڕه‌ویان كردووه‌.
ئه‌م به‌رپرسیارێتیه‌ پێش هه‌موو كه‌س له‌ ئه‌ستۆى یه‌كێتى و پارتییه‌، چونكه‌ له‌ماوه‌ى ساڵانى ڕابردوودا ئه‌وان به‌رپرسیارى ڕاسته‌وخۆى مه‌له‌فى كه‌ركوك بوون و هه‌موو ئه‌و سازشانه‌ى كراوه‌ ئه‌وان به‌رپرسیارن لێى. چما هه‌موو نازانین زۆر هه‌ڕه‌شه‌یانكرد و هیچیان نه‌كرد. زۆر سنوور و هێڵى سووریان دانا و به‌زێنرا و خۆیان لێ تێنه‌گه‌یاند.
یه‌كێتى و پارتى مه‌ترسین له‌سه‌ر كه‌ركوك، ئه‌وان ده‌بێت ڕێ له‌ دابه‌شبوونى هێزه‌ كوردییه‌كان بگرن و سازشیان بۆ بكه‌ن. پێویسته‌ ئاشتیان بكه‌نه‌وه‌، ده‌بێت ئه‌و پۆستانه‌ى له‌سه‌ر ئه‌وان تاپۆ كراوه‌ وازى لێبێنن و نه‌وه‌یه‌كى ترى سیاسى به‌ڕێوه‌ى ببات.
وه‌ك باسده‌كرێت یه‌كێتى و پارتى خودى خۆشیان به‌نیازن به‌جیا به‌شدارى هه‌ڵبژاردنه‌كه‌ بكه‌ن، ئه‌وه‌ گۆڕان له‌ولاوه‌ بوه‌ستێ كه‌ له‌ده‌ره‌نجامى شكستى نوێنه‌رانى لیستى برایه‌تى كه‌ركوك ده‌یانه‌وێت ئه‌م نۆره‌یه‌ بۆ ئه‌وان بێت.
یه‌كێتى و پارتى ده‌بێت بڕوا به‌وه‌ بكه‌ن براده‌رێكى یه‌كگرتوو ببێته‌ سه‌رۆكى ئه‌نجومه‌نى پارێزگاى كه‌ركوك له‌ براده‌رێكى به‌ره‌ى توركمانى باشتره‌. سازشكردن بۆ گۆڕان له‌ عه‌شایه‌رى عه‌ره‌ب و برا توركمانه‌كان شانازیتره‌.
دابه‌شكارى ئه‌مجاره‌ له‌ كه‌ركوك له‌ ئه‌ستۆى یه‌كێتى و پارتییه‌، پێویسته‌ به‌هه‌ر نرخێك بێت ڕێگرى لێبه‌كه‌ن، ده‌نا مێژوو ئه‌م كاره‌ چه‌وته‌ له‌بیر ناكات.