له‌ گه‌رمیانه‌وه‌ بۆ هه‌موو جیهان

 

زه‌نگ كورد

zengkurd.net

 

 

زه‌نگێك بۆ هۆشیارى هاووڵاتى.. زه‌نگێك بۆ بێدارى ده‌سه‌ڵات

 

نامه‌كانى ژنێكى دوور
نامه‌ى 41
ژن له‌ هه‌موو شوێنێكی ئه‌م جیهانه‌ ده‌كوژرێت

ڤینۆس فایه‌ق-هۆڵه‌ند

یه‌كێ له‌ پرسیاره‌كانی رۆژنامه‌نووسێكی پیاوی ره‌گه‌زپه‌رست لێی كردم، به‌ته‌وسه‌وه‌ گوتی: باشه‌ ژنی كورد ئه‌م هه‌رایه‌ی بۆ ناوه‌ته‌وه‌، خۆ ژن له‌ هه‌موو جێگایه‌ك ده‌كوژرێت.. سه‌یرم پێهات ئه‌و كابرایه‌ به‌و شێوازه‌ مامه‌ڵه‌ له‌گه‌ڵ پرسێكی له‌و چه‌شنه‌ ده‌كاته‌وه‌. به‌باوه‌ڕی من له‌وه‌ته‌ی فامم كردۆته‌وه‌ و له‌ دنیا تێگه‌یشتووم، له‌وه‌ته‌ی وشیاریم دروستبووه‌، له‌وه‌ تێده‌گه‌م و باوه‌ڕی پێده‌كه‌م كه‌ هیچ شتێك نیه‌ له‌ دونیادا شایسته‌ی ئه‌وه‌بێت ئاده‌میزادێكی له‌سه‌ر بكوژیت، ته‌نها خیانه‌تی نیشتیمانی، ئیتر ژن بێت یان پیاو شایسته‌ی كوشتنه‌.. له‌وه‌ بترازێت هیچ بوونه‌وه‌رێك نیه‌ له‌ دونیادا شایسته‌ی كوشتن بێت..
به‌ڵام ئه‌و براده‌ره‌ ویستی به‌من بڵێت، بۆچی خۆتان شپرزه‌ كردووه‌، خۆ ژن ته‌نها له‌ كوردستان ناكوژرێت، وه‌ڵامم دایه‌وه‌ گوتم: راسته‌ ژنكوشتن پرسێكی مرۆڤایه‌تیه‌، له‌ هه‌موو كۆمه‌ڵگاكانی دونیادا رووده‌دات، به‌ڵام ئه‌وه‌ی مایه‌ی شه‌رمه‌زاریه‌ ئه‌وه‌یه‌ رێژه‌ی ژنكوشتن له‌و كۆمه‌ڵگایانه‌دا له‌ زیادبووندایه‌ كه‌ بانگه‌شه‌ بۆ پرنسیپه‌ دینیه‌كان و خێر و شه‌ڕ ده‌كه‌ن و ده‌سه‌ڵاتی دین چه‌سپاوه‌، به‌ناوی دینه‌وه‌ رۆژانه‌ چه‌ندین ژن ده‌كرێنه‌ قوربانی عورف و یاسا و نه‌ریته‌ كۆمه‌ڵایه‌تی و دینیه‌ تاریك و داخراوه‌كان..
له‌ هه‌موو دونیا ژن ده‌كوژرێت، به‌ڵام له‌هه‌موو جێگایه‌كی دونیا مافی ژن له‌ مافه‌كانی مرۆڤ جیانه‌كراوه‌ته‌وه‌، ئه‌و ده‌می ژنێك ده‌كوژرێت، له‌به‌رانبه‌ریدا یاسا هه‌یه‌ سه‌روه‌ره‌ و رۆڵی خۆی ده‌گێڕێت و، به‌دواداچوون ده‌كات و بكه‌ر و بكوژه‌كان ده‌داته‌ ده‌ست سزای عادیلانه‌ی خۆیان.
له‌ هه‌موو جێگایه‌كی ئه‌م دونیایه‌ ژن ده‌كوژرێت، به‌ڵام باوه‌ڕ ناكه‌م وه‌كوو كوردستانی ئێمه‌ كوشتنی ژن وه‌كوو پرس هێند له‌لایه‌ن ده‌سه‌ڵاتی سیاسیه‌وه‌ په‌راوێزخرابێت، ئه‌گه‌رچی بۆریكلام و هاتوهاوار و لایه‌نگر زیادكردن لیژنه‌ و لیژنه‌كاری بۆ دروست ده‌كه‌ن، به‌ڵام هیچی له‌ چوارچێوه‌ی حزبی و كێبركێی حزبی و ململانێی حزبی تێپه‌ڕناكات، هیچی ئه‌و هه‌وڵانه‌ بۆ سه‌رتاسه‌ری كۆمه‌ڵگا نیه‌، به‌مه‌به‌ستی بنبڕكردنی ئه‌و دیارده‌یه‌ نیه‌، ته‌نها بۆ نمایشكردنی هێز وبازووی حزبی و تاكه‌كه‌سیه‌، ته‌نانه‌ت ئه‌و ژنانه‌ی له‌ناو كوردستاندا له‌و بواره‌دا له‌ڕێی حزبه‌كانیانه‌وه‌ چالاكن، هه‌رهه‌موو ركه‌به‌رایه‌تی یه‌كتر ده‌كه‌ن و ژنه‌كان له‌ناو خۆیاندا تانه‌و ته‌شه‌ر و ململانێ و ملشكاندن بنه‌مای كاركردنیانه‌، كه‌ ئه‌وه‌ش یه‌كێكه‌ له‌و فاكته‌رانه‌ی كه‌ وای كردووه‌ هه‌موو هه‌وڵ و كۆششه‌كان بۆ بنبڕكردنی ئه‌و دیارده‌یه‌ نشوستی بهێنێت..
ژن له‌ هه‌موو دونیا ده‌كوژرێت، به‌ڵام ژنه‌كانی له‌ بواری داكۆكی له‌ ماف و ئازادیه‌كانی ژن و چالاك له‌ بواری هه‌وڵدان بۆ بنبڕكردنی ئه‌و دیارده‌یه‌ به‌هێندی كوردستانه‌كه‌ی ئێمه‌ دژایه‌تی یه‌كتر ناكه‌ن و له‌ بنباڵی حزبه‌كانیانه‌وه‌ یه‌كتر ناشكێنن..
باوه‌ڕم وایه‌ ئه‌گه‌ر ژنه‌كان له‌گه‌ڵ یه‌كتر یه‌كبگرن و یه‌خه‌ی ئه‌و حزبه‌ پیاوسالارانه‌ به‌رده‌ن و پێكه‌وه‌ خه‌بات بكه‌ن، دۆزی ژن هه‌نگاوی زۆر باشتر ئه‌نێت له‌وه‌ی كه‌هه‌یه‌.
ژن له‌ هه‌موو جێگایه‌كی دونیا ئه‌كوژرێت، به‌ڵام له‌ زۆربه‌ی جێگاكانی دونیا ژن به‌شدارێكی ئه‌كتیف و كارا و ته‌كنۆكراتی ناو ده‌سه‌ڵاتی حكومیه‌ و ده‌نگی به‌رزه‌، توانای وه‌ستانی هه‌یه‌ به‌ رووی ده‌سه‌ڵاتی پیاودا، به‌ڵام له‌ كوردستانی ئێمه‌ به‌ فه‌رمانی پیاوه‌كان و به‌فه‌رمانی حزبیه‌كان نه‌بێت هیچ پرۆژه‌یه‌ك سه‌رناگرێت و هیچ پرۆژه‌یه‌ك رووناكی نابینێت.
له‌هه‌موو جێگایه‌كی ئه‌م دونیایه‌ ژن ده‌كوژرێت، به‌ڵام هیچی له‌و جیگایانه‌ به‌تایبه‌ت له‌ ناوچه‌ی خۆرهه‌ڵات به‌هێندی كوردستان ئیددیعای دیموكراتیه‌ت و ئازادیه‌كانی تیانیه‌. له‌ هیچ كوێیه‌كیش به‌ هێندی كوردستانی ئازادی ئێمه‌ رێژه‌ی ژن له‌و به‌رزبوونه‌وه‌ ترسناكه‌دا نیه‌..
venusfaiq@yahoo.co.uk
 

په‌یوه‌ندى:        zeng_rojane@yahoo.com         zengkurd@yahoo.com